मुंबई | संरक्षण दलात भरती होऊन देश सेवा करण्याची अनेकांची इच्छा असते. त्या दृष्टीने अनेक तरुण शारीरिक मेहनती बरोबर शैक्षणिक तयारी करतात. मात्र संरक्षण दलांत निकषांवर आधारित भरती होत असल्याने सर्वच तरुणांना यात यश मिळतेच असं नाही. (Army Navy Airforce Recruitment)
एकीकडे ही स्थिती असली तरी, दुसरीकडे सध्या भारतीय लष्कर, हवाई दल आणि नौदलात मोठ्या प्रमाणावर पदे रिक्त आहेत. या तिन्ही दलांमध्ये दीड लाखांहून अधिक जागा रिक्त आहेत. या रिक्त पदांसाठी भरती प्रक्रिया केव्हा सुरू होणार हे अद्याप अस्पष्ट असलं तरी त्या दृष्टीने पावलं उचलली जात असल्याचं स्पष्टीकरण सरकारने दिले आहे. (Army Navy Airforce Recruitment)
भारतीय लष्कर, नौदल आणि हवाई दलातील भरती प्रक्रियेकडे तरुणांचं विशेष लक्ष असतं. देशभरातील तरुण या भरती प्रक्रियेत सहभागी होतात. तिन्ही दलांमध्ये सध्या 1.55 जागा रिक्त आहेत. भारतीय लष्कर, हवाई दल आणि नौदलात सध्या पदं रिक्त असल्याने अनेक अडचणींचा सामना करावा लागत आहे. या पैकी सर्वाधिक 1.36 लाख पदे लष्करात रिक्त आहेत. या संदर्भातील माहिती नुकतीच राज्यसभेत देण्यात आली आहे.
लष्करात अधिकाऱ्यांची अनेक पदं रिक्त आहेत. आर्मी मेडिकल कॉर्प्स आणि आर्मील डेंटल कॉर्प्ससह लष्करात 8129 अधिकाऱ्यांची कमतरता आहे. मिलिट्री नर्सिंग सर्व्हिसमध्ये 509 तसेच जेसीओ आणि अन्य रिक्त पदांची संख्या 1,27,673 आहे. ग्रुप ए मध्ये 252, ग्रुप बीमध्ये 2549 आणि ग्रुप सीमध्ये 35,368 पदं रिक्त आहेत.
भारतीय नौदलात एकूण 12,428 पदं रिक्त आहेत. नौदलाला 1653 अधिकारी, 29 वैद्यकीय आणि दंत अधिकाऱ्यांची तर 10,746 खलाशांची गरज आहे. नौदलात ग्रुप एमध्ये 165, ग्रुप बीमध्ये 4207 आणि ग्रुप सीमध्ये 6156 पदं रिक्त आहेत.’
हवाई दलात 7031 पदं रिक्त आहेत. त्यात 721 अधिकारी, 16 वैद्यकीय अधिकारी, 4734 एअरमन आणि 113 वैद्यकीय सहायक एअरमन या पदांचा समावेश आहे. हवाई दलात ग्रुप एमध्ये 22, ग्रुप बीमध्ये 1303 आणि ग्रुप सीमध्ये 5531 पदं रिक्त आहेत. तिन्ही दलांतील रिक्त पदांचा आकडा बघता, भरती प्रक्रिया तातडीने राबवली जाणं गरजेचं आहे.