इंडियन ओवरसीज बँकेत पदवीधरांसाठी 500 हून अधिक पदांची भरती; त्वरित अर्ज करा | IOB Recruitment 2024

मुंबई | इंडियन ओवरसीज बँकेने रिक्त पदांसाठी भरतीची (IOB Recruitment 2024) घोषणा केली आहे. याबाबतची अधिसूचना जारी करण्यात आली असून बँकेत 550 जागांवर अप्रेंटिस पदे भरली जाणार आहेत. यासाठी पदवीधर उमेदवार अर्ज दाखल करु शकतात. सध्या या पदांसाठी अर्ज नोंदणी सुरु आहे. ज्या उमेदवारांना बँकिंग क्षेत्रात करिअर करायचं आहे त्यांच्यासाठी ही सुवर्णसंधी आहे. पात्र आणि इच्छुक उमेदवार 10 सप्टेंबरपर्यंत अर्ज दाखल करु शकतात.  
 
इंडियन ओवरसीज बँकेत अप्रेंटिससाठी अर्ज करण्यासाठी उमेदवारांचं वय 20 वर्ष ते 28 वर्षांदरम्यान असणं आवश्यक आहे. इंडियन ओवरसीज बँकेच्या निवड प्रक्रियेनंतर ज्यांची अप्रेंटिससाठी निवड होईल त्यांना 10 हजार ते 15 हजार रुपये विद्यावेतन दिलं जाईलं.  

अप्रेंटिसची संधी देण्यासाठी अर्ज दाखल करणाऱ्या उमेदवारांची इंडियन ओवरसीज बँक ऑनलाईन परीक्षा घेईल. त्यानंतर स्थानिक भाषा परीक्षा आणि मुलाखतीनंतर  निवड केली जाईल. अर्ज दाखल करणाऱ्या उमेदवारांना  परीक्षा आणि अर्जाचं शुल्क द्यावं लागेल. खुल्या प्रवर्गातील उमेदवारांना 944 रुपये, आरक्षित प्रवर्गातील उमेदवारांसाठी 708 रुपये आणि दिव्यांग उमेदवारांना 472 रुपये शुल्क द्यावं लागेल. 

दरम्यान, इंडियन ओवरसीज बँक ऑनलाईन परीक्षा 22 सप्टेंबर रोजी घेण्याची शक्यता आहे. तर, महाराष्ट्रातील उमेदवारांसाठी 29 जागा निश्चित करण्यात आलेल्या आहेत. 

अर्ज कसा करायचा?

स्टेप 1: इंडियन ओवरसीज बँकेची अधिकृत वेबसाइट iob.in ला भेट द्या.
स्टेप 2: होमपेजवरील भरती प्रक्रिया या लिंकवर क्लिक करा.
स्टेप 3: उमेदवारांनी नोंदणी प्रक्रिया करावी.
स्टेप 4: लॉगिन डिटेल्स मिळाल्यानंतर साईन इन करा.
स्टेप 5: अर्जात नमूद असलेल्या सर्व बाबींची माहिती भरा.
स्टेप 6:  आवश्यक कागदपत्रं अपलोड करा.
स्टेप 7: अर्जाचं शुल्क भरा.
स्टेप 8: अर्जाचं शुल्क भरल्यानंतर अर्जाची प्रत डाऊनलोड करा.
स्टेप 9:  अर्जाची प्रिंट काढून ठेवा.