कागल | यमगे (ता. कागल) – दोन खोलींचं घर, बकरी चारणारे वडील, खेळ-टीव्हीपासून अलिप्त राहून अभ्यास करणारा मुलगा – आणि स्वप्न होतं “आयपीएस व्हायचं!”. हे स्वप्न जिद्दीने जगत, यमगे गावातील बिरदेव डोणेंनी 2024 च्या UPSC परीक्षेत देशात 551 वा क्रमांक पटकावला. अवघ्या 27व्या वर्षी, पहिल्याच प्रयत्नात हे यश मिळवत तो कागल तालुक्यातून आयपीएस होणारा पहिलाच युवक ठरला आहे.
#बिरदेवडोणे #UPSC2024 #IPS #InspirationFromRuralIndia
गावकुसाबाहेरचं शिक्षण, पण स्वप्न मोठं
सिद्धाप्पा डोणे या मेंढपाळाच्या मुलाने यमगे येथील विद्यामंदीर शाळेत प्राथमिक आणि जयमहाराष्ट्र हायस्कूलमध्ये माध्यमिक शिक्षण घेतलं. मुरगूडच्या शिवराज विद्यालयातून विज्ञान शाखेत बारावी पूर्ण करताना गणितात 100 पैकी 100 गुण मिळवले. दहावी आणि बारावी दोन्ही वेळा मुरगूड केंद्रात प्रथम क्रमांक पटकावणारा बिरदेव सुरुवातीपासूनच अभ्यासात तेजस्वी होता.
इंजिनिअरिंगसाठी पुण्यातील नामांकित सीओईपी कॉलेजची निवड केली आणि त्यानंतर थेट दिल्ली गाठली – एकमेव उद्दिष्ट होतं UPSC पास करायचं. दिल्लीतील ‘नेक्स्ट आयएएस’ आणि ‘वाझराम’सारख्या नामवंत क्लासेसमध्ये मार्गदर्शन घेत, दिवसातून तब्बल २२ तास अभ्यास करत त्याने स्वप्नं सत्यात उतरवण्याची तयारी केली.
घरच्यांचा संघर्ष, त्याच्या यशाचं बळ
बिरदेवचा प्रवास त्याच्या कुटुंबाशिवाय अपूर्ण आहे. वडील सिद्धाप्पा यांनी बारावीपर्यंत शिक्षण घेतलेलं, पण मेंढपाळ व्यवसाय करत कुटुंबाचा चरितार्थ चालवत राहिले. आई बाळाबाई, विवाहित बहिण, भारतीय सैन्यात असलेला भाऊ वासुदेव – सगळ्यांनी एकत्रितपणे बिरदेवच्या स्वप्नांना हातभार लावला. दिल्लीसारख्या महागड्या शहरात शिकण्यासाठी महिन्याला १०-१२ हजार रुपये पाठवणं वडिलांसाठी मोठं आव्हान होतं. कधी-कधी त्यांनी बिरदेवला नोकरी करण्याचा सल्लाही दिला. पण उत्तर एकच होतं – “माझं ध्येय स्पष्ट आहे, मी यशस्वी होणारच.”
निकाल लागला, गावात जल्लोष
23 एप्रिल रोजी निकाल जाहीर झाला. तेव्हा बिरदेव मामाच्या गावी बेळगावात होता. निकालाच्या बातमीने गावात एकच जल्लोष उसळला. अनुपस्थितीतही मित्रांनी यमगेमध्ये फटाके फोडले, गुलाल उधळला आणि सगळं गाव ‘आपला बिरदेव’ म्हणून अभिमानाने बोलू लागलं. काही दिवसांपूर्वीच बिरदेवने आपल्या नेव्हीत असलेल्या गावकरी मित्राला सांगितलं होतं – “इंटरव्यू झालंय, माझी निवड निश्चित आहे. पण अजून कुणाला सांगू नको.”
नवोदयला नाकारला, पण यश झेपलं
पाचवीत असताना नवोदय विद्यालयाच्या परीक्षेत अपयश आलं होतं. तेव्हाच त्याने ठरवलं – खेळ, टीव्ही, मोबाईल दूर ठेवायचं आणि अभ्यासालाच प्राधान्य द्यायचं. ही जिद्द आणि निष्ठा आज त्याला देशसेवेसाठी सज्ज करत आहे.
खेड्यांमधील युवकांचा रोल मॉडेल
बिरदेव डोणे ही केवळ एक यशोगाथा नाही, ती आहे मेहनतीच्या, चिकाटीच्या, आणि स्वप्नांवर विश्वास ठेवणाऱ्या मनाच्या विजयाची कहाणी. ‘साध्या घरातून आलेलं मूल, देशाची सेवा करणारा अधिकारी’ – हे चित्र प्रत्येक ग्रामीण विद्यार्थ्याला प्रेरणा देणारे ठरेल.
कागल तालुक्याचा हा पहिला आयपीएस अधिकारी – आता फक्त यमगेचाच नाही, तर महाराष्ट्राच्या तमाम खेड्यांमधील युवकांचा रोल मॉडेल ठरतो आहे.