TET Exam Update 2026: रद्द झालेली शिक्षक पात्रता परीक्षा कधी होणार? जाणून घ्या

TET Exam Update 2026: राज्य परीक्षा परिषदेने महाटीईटी (शिक्षक पात्रता परीक्षा) पेपरफुटीच्या पार्श्वभूमीवर परीक्षा रद्द करण्याचा निर्णय घेतल्यानंतर राज्यभरातील लाखो उमेदवारांमध्ये अनिश्चिततेचे वातावरण निर्माण झाले आहे. परीक्षा रद्द झाल्यानंतर रविवारी राज्यातील सर्व जिल्हास्तरावरून सुमारे सहा लाख कोऱ्या उत्तरपत्रिका परत जमा करून घेण्यात आल्या. आता ही परीक्षा पुन्हा घेण्यासाठी परिषदेला किमान दोन महिन्यांचा कालावधी लागणार असल्याची माहिती अधिकारी सूत्रांकडून देण्यात आली आहे.

परीक्षा रद्द झाल्यामुळे राज्यातील सुमारे सहा लाख १२५ उमेदवारांना मोठा फटका बसला आहे. यामध्ये शिक्षकांची संख्या लक्षणीय असून, परीक्षेसाठी नोंदणी केलेल्या दोन लाख २६ हजार शिक्षकांची धाकधूक अधिक वाढली आहे. सर्वोच्च न्यायालयाने टीईटी उत्तीर्णतेसाठी २०२८ पर्यंत मुदत दिल्यामुळे यंदा विक्रमी प्रमाणात शिक्षकांनी परीक्षेसाठी अर्ज केले होते.

पेपरफुटीची घटना समोर आल्यानंतर राज्य परीक्षा परिषदेच्या वरिष्ठ अधिकाऱ्यांची रविवारी तातडीची बैठक झाली. या बैठकीत परीक्षा पुन्हा घेण्याच्या प्रक्रियेसह विविध प्रशासकीय आणि तांत्रिक बाबींवर चर्चा करण्यात आली. परीक्षेच्या अवघ्या काही तास आधी परीक्षा रद्द करण्याचा निर्णय घेण्यात आल्याने अनेक जिल्ह्यांमध्ये परीक्षा केंद्रांवर आवश्यक साहित्य पोहोचले होते. परीक्षा कक्षांमध्ये उमेदवारांच्या बैठक क्रमांकांची नोंदही पूर्ण झाली होती. मात्र परीक्षा रद्द झाल्याची माहिती मिळताच संपूर्ण प्रक्रिया तातडीने थांबवण्यात आली.

परीक्षा पुन्हा घेण्यासाठी राज्य परीक्षा परिषदेला अनेक टप्प्यांत तयारी करावी लागणार आहे. नव्याने प्रश्नपत्रिका तयार करणे, छपाई प्रक्रियेत संपूर्ण गोपनीयता राखणे, नवीन तारखेचे नियोजन करणे, त्या कालावधीत इतर कोणत्याही मोठ्या परीक्षा नसतील याची खात्री करणे, परीक्षा केंद्रांची उपलब्धता तपासणे तसेच पावसाळ्याचा विचार करून योग्य वेळ निश्चित करणे अशा अनेक बाबींचा सखोल अभ्यास करावा लागणार आहे. या सर्व प्रक्रियेमुळे परीक्षा घेण्यासाठी किमान दोन महिन्यांचा कालावधी लागू शकतो, असे अधिकाऱ्यांचे म्हणणे आहे.

दरम्यान, रविवारी राज्यातील ३७ परीक्षा जिल्हा नियोजन केंद्रांवरून सर्व कोऱ्या उत्तरपत्रिका परत जमा करून घेण्यात आल्या. ही प्रक्रिया पूर्ण झाल्यानंतरच पुढील नियोजनाला गती दिली जाणार आहे.

यंदाच्या महाटीईटी परीक्षेसाठी एकूण सहा लाख १२५ उमेदवारांनी नोंदणी केली होती. त्यापैकी सुमारे तीन लाख ४६ हजार अर्ज शिक्षक वर्गातील होते. प्रत्यक्षात दोन लाख २६ हजार शिक्षकांनी परीक्षा देण्यासाठी नोंदणी केली असून, त्यामध्ये ‘पेपर-१’च्या तुलनेत ‘पेपर-२’साठी सर्वाधिक अर्ज प्राप्त झाले आहेत. त्यामुळे परीक्षा पुढे ढकलल्याचा परिणाम विशेषतः सेवेत असलेल्या आणि टीईटी पात्रता मिळविण्याच्या प्रतीक्षेत असलेल्या शिक्षकांवर अधिक होणार आहे.

महत्त्वाचे आकडे