खुशखबर: महाराष्ट्रात 2992 कोतवाल पदांची भरती, पदे 30 नोव्हेंबरपूर्वी भरणार, संधी चुकवू नका | Kotwal Bharti 2026

Kotwal Bharti 2026: राज्यातील महसूल विभागात रिक्त असलेल्या महसूल सेवक अर्थात कोतवाल पदांच्या भरतीची प्रतीक्षा करणाऱ्या उमेदवारांसाठी मोठी आणि दिलासादायक बातमी समोर आली आहे. महाराष्ट्र शासनाच्या महसूल व वन विभागाने राज्यभरातील रिक्त कोतवाल पदे भरण्यास विशेष बाब म्हणून मान्यता दिली असून, ही भरती प्रक्रिया तातडीने राबविण्याचे निर्देश सर्व जिल्हाधिकाऱ्यांना देण्यात आले आहेत. शासनाने स्पष्टपणे सांगितले आहे की, कोणत्याही परिस्थितीत ही भरती प्रक्रिया 30 नोव्हेंबर 2026 पूर्वी पूर्ण करण्यात यावी.

महसूल व वन विभागाच्या कार्यासन अधिकारी सुजाता माणसार यांनी 19 ऑगस्ट 2026 रोजी यासंदर्भातील पत्र राज्यातील सर्व जिल्हाधिकाऱ्यांना पाठविले आहे. या पत्रानुसार, 30 एप्रिल 2026 रोजी राज्यात महसूल सेवक (कोतवाल) संवर्गातील एकूण 2,992 पदे रिक्त होती. त्यामुळे नागरिकांना महसूल सेवा अधिक प्रभावीपणे उपलब्ध करून देण्यासाठी ही पदे भरण्याचा निर्णय घेण्यात आला आहे.

शासनाच्या निर्देशानुसार, प्रत्येक जिल्ह्यातील भरती प्रक्रिया जिल्हाधिकारी किंवा त्यांनी नामनिर्देशित केलेल्या अधिकाऱ्यांच्या अध्यक्षतेखालील निवड समितीमार्फत पार पडणार आहे. भरती करताना शासन निर्णयातील सुधारित तरतुदी, आरक्षण नियम आणि इतर प्रशासकीय अटींचे काटेकोरपणे पालन करण्याच्या सूचना देण्यात आल्या आहेत. तसेच भरती प्रक्रियेत कोणतीही त्रुटी राहणार नाही याची जबाबदारी संबंधित निवड समितीवर सोपविण्यात आली आहे.

जिल्हानिहाय कोतवाल (महसूल सेवक) रिक्त पदांची माहिती

महसूल सेवक किंवा कोतवाल हे गावपातळीवरील महसूल प्रशासनातील महत्त्वाचे पद मानले जाते. महसूल विभागाच्या विविध कामांमध्ये मदत करणे, शासकीय सूचना नागरिकांपर्यंत पोहोचवणे, पंचनामे आणि प्रशासकीय कामकाजात सहकार्य करणे अशा जबाबदाऱ्या कोतवालांकडे असतात. त्यामुळे ही भरती ग्रामीण भागातील रोजगाराच्या दृष्टीनेही महत्त्वाची मानली जात आहे.

उमेदवारांनी सध्या संबंधित जिल्हाधिकारी कार्यालयांच्या अधिकृत संकेतस्थळांवर लक्ष ठेवणे आवश्यक आहे. भरतीची जाहिरात, शैक्षणिक पात्रता, वयोमर्यादा, अर्ज प्रक्रिया, निवड पद्धत आणि इतर अटी जिल्हानिहाय स्वतंत्रपणे जाहीर केल्या जाणार आहेत. शासनाच्या तातडीच्या निर्देशांमुळे येत्या काही दिवसांत विविध जिल्ह्यांमधून भरती जाहिराती प्रसिद्ध होण्याची शक्यता व्यक्त केली जात आहे. त्यामुळे कोतवाल भरतीची तयारी करणाऱ्या उमेदवारांसाठी ही एक मोठी संधी ठरणार आहे.